CEBU, Philippines - Patay ang usa ka mananagat human kini gisukmag sa iyang bayaw tungod kay wala mopatuo dihang gibadlong sa pagpakig-away niini sa ilang tiguwang nga amahan diha sa sitio Cabancungan, barangay Japitan lungsod sa Barili niadtong Lunes sa alas 8:30 sa gabii.
Ang biktima nga patay nang nakit-an human masukmagi mao si Luciano Gimarangan, 50, samtang ang suspek mao ra ang bana sa iyang igsuon nga babaye nga si Isabelo Patatag, 46, nagpuyo gihapon sa maong lugar.
Matud ni SPO2 Zaldy Orello sa Barili Police dihang nahinabi sa Banat News ang biktima ug ang amahan niini nga si Marcial Gimarangan,70, maoy unang nag-away nga misangpot sa sukmagay.
Ang suspek pagkakita sa gibuhat sa bayaw ngadto sa iyang ugangan daling miduol aron uwangon ang duha apan wala mopatuo ang biktima ug migara hinuon kini og wild.
Hinungdan nga nasukmagan kini sa tiyan sa suspek aron mopatuo, human niini mihilom ang biktima pagkatilaw sa santako ug mipauli nga nagpanghikap sa iyang tiyan.
Apan paglabay og pipila ka minutos, ang biktima nakit-an nalang sa ilang paryente nga si Theresita Gimarangan nga nagbuy-od na kini sulod sa pinuy-anan niini nga wala nay panimuot ug dihang gitabang nasuta nga patay na.
Ang kapulisan mipa-awtopsiya sa patay’ng lawas sa biktima pagtino kun ang pagsukmag ba sa suspek ang hinungdan sa kamatayon niini.
Ang suspek kasamtangan karung gitanggong sa karsel sa kapulisan samtang nagpadayon ang imbestigasyon ug nagpaabot sa resulta sa awtopsiya. (EIM)(BANAT NEWS)