CEBU, Philippines - Giklaro ni Lapulapu City Mayor Paz Radaza ang taho nga kasamtangang gihunong ang implementasyon sa Towing Ordinance sa dakbayan sa Lapulapu.
Atol sa usa ka press conference si Radaza mipadayag nga padayon ang implementasyon sa maong ordinansa gani daghan na ang mga nakamulta.
Hinuon gipasabot ni Radaza nga dunay mga panid sa maong ordinansa nga angayang tukion sa hawanan sa konseho aron palig-onon pa sa maong balaod sa towing ordinance.
Ang City Traffic Management System (CTMS) namutang kaniadto pa og mga karatola sa mga kadalanan sa dakbayan sa Lapulapu diin dili mahimong makapataka og park.
Ang makalapas niini guroyon ug dad-on sa yarda sa motorpool sa dakbayan ug malukat lamang kini human nga makabayad sa multa.
Kahinumduman nga usa ka sakop sa CTMS ang nahinabi sa Banat News ang mipadayag nga kasamtangang gihunong ang implemantasyon sa maong ordinansa gumikan sa dakong alkanse sa towing company sa kagamay sa multanga gibase sa City Towing Ordinance.
Matud pa sa maong empleyado sa CTMS kinahanglan nga amendahan una ang maong ordinansa sa konseho sa dakbayan sa Lapulapu ug patas-an ang multa sa mga makalapas sa maong ordinansa.
Ang kasamtangang ordinansa adunay multa gikan sa P1,500 ngadto na sa P3,500 depende kung adlawan o gabii ba kini nadakpan ug may patong matag adlaw sa impounding fee, human sa 60 ka adlaw nga di lukaton ang sakyanan kompiskahon naang sakyanan. (BANAT NEWS)