Buhi pa dihang gihiwa ang tiyan

CEBU, Philippines - Buhi pa ang 6-anyos nga bata dihang gibuak ang tiyan ug gilaslas ang iyang dughan base sa gihimong awtopsiya ni Dr. Nestor Satur, ang hepe sa PNP Regional Crime Laboratory.

Si Sator sa pakighinabi sa Banat News kagahapon nagkanayon nga daw gisusama ni Efren Matedios, 29, sa brutal nga salidang ‘Saw’ ang biktima tungod sa paghabwa niini sa halos tanang sulod sa lawas sa bata.

Base sa iyang awtopsiya, ang gikamatyan sa bata mao ang dakong laslas sa tiyan niini apan nakakita og mga timailhan si Sator nga buhi pa kini dihang gihimo ang pagpatay.

“Possible nga gikabay-an ang duha ka paa ug gihiwa ang tiyan nga buhi pa ang bata dayon gihabwa ang tanang sulod sa tiyan,” matud pang Sator sa interbyu sa telepono.

Nakaangkon usab og dakong samad sa dughan ug sa agtang ang bata ug nakakita usab sila og daghang mga bun-og sa halos tanang ibabaw nga bahin sa lawas sa bata.

Ang suspek nadakpan sa polis ug mga tanod kagahapon sa alas 12:30 sa kaadlawon diha sa crime scene sa barangay Villahermosa lungsod sa Tabuelan ug giingong hubo kini sa tanang sapot dihang ilang naabtan.

Matud ni PO2 Winston Ybañez sa Tabuelan Police kinsa usa sa mga midakop sa suspek dihang nahinabi sa Banat News ang suspek nianang Lunes sa hapon miuli sa balay apan nakabantay kini sa mga awtoridad ug misibat, ang gibilin nga mga tanod hangtud pagkagabii mao nay mipahibalo sa mga polis nga miuli kini og balik hinungdan sa pagkasikop niini.

Gipatambalan si Matedios tungod sa mga samad niini sa tuhod ug sa palad nga gituohang tungod sa iyang pag-ikyas.

Ang kapolisan nakamatikod nga nagpanglingog-lingog lang kini nga daw nagpatuong naliso-an sa pangisip tungod sa nagkalain-laing tubag niini.

Base sa nagkadaiyang report aduna kini tubag nga ‘nayawaan ra siya,’ miingon usab siyang iyaha kining gibuhat aron magkahiusa silang pamilya, samtang aduna say pagdudang gisudlan kini og dautang espiritu.

Ang tanod nga si Adonis Montuerto nga miluwat og affidavit nga nakakita siya sa pag-responde niya nga gikaon gyud sa suspek ang atay sa bata nga gisulod sa plato ug gisuwa pa sa asin.

Ang kolumnistang si ‘Mr. Barangay’ Jun Veleganio sa report niini sa Balitang Bisdak kagahapon nga nakahinabi sa apohan sa biktima nga wala nila hinganli miingon nga gikan pa sa barangay Canlim ang suspek nga nangawat og prutas nga caimito sa sayo pa nianang adlawa.

Ang apohan nagkanayon nga sukad sa pagkaon og caimito sa suspetsado nagpunay na kini og ingon nga ‘katam-is sa caimito’ ug wa na kini mahimutang.

Nianang pagkahapon, giingong gitanggong silang duha (apil ang biktima) sa suspetsado ug wala na pagawsa ug gihulgang dunggabon kun sila mogawas.

Pagkagabii ang suspetsado miingon sa biktima nga adto kaniya motapad apan ang apohan mibalibad niini tungod kay tua man kaniya ang mosketiro.

Tungod niini nasuko ang suspek ug gani iyang giyatak-yatakan ang iyang inahan ug wala pa matagbaw gitigbas niya kini og guna sa agtang apan habulan ang maong guna ug daling naka-ikyas ang apohan.

Ang biktima nga nahibilin sa sulod sa panimalay mao na usab ang gipahimungtan sa suspetsado.

Sa diha nga namatay na, mao puy pag-abot sa tanod nga si Monsueto ug nakit-an niya nga gihiwa sa suspek ang tiyan sa biktima ug gihabwa ang ginhawaan sa bata.

Matud pa nga nadunggan ni Monsueto ang suspek samtang nagkaon sa atay ug ginhawaan nga nagpunay og yawyaw og ‘kalami gyud sa atay, parehas katam-is sa caimito.’

Ang suspek miingon nga iyang pinangga ang biktima ug dili siya maoy mipatay niini kondili ang ‘mangtas nga balbal’ ug gani gitabang niya ang bata apan nakabsan lang gyud kini sa kinabuhi.

Nagduda usab ang inahan sa suspek nga nasudlan og dautang espiritu ang anak tungod kay gipalibotan og mga dagkong kahoy nga Dita ang punoan sa caimito nga gikuhaan niini og bunga.

Nasuta usab nga dili burokinto ang suspek ug wala kini mailhing badlungon sa ilang barangay ug wala sad kini bisyo.

Apan ang brutal nga pagpatay sa bata nagbunga og kahadlok sa mga residente sa maong barangay ug gani adunay mga silingan nila nga nag-usa ra sa labing lig-ong panimalay sa ilang pagkatulog niadtong Martes sa gabii. (EIM)(BANAT NEWS)