Mga water dispenser kontrolahon

CEBU, Philippines - Si konsehal Michael Ralota sa dakbayan sa Sugbo naglaraw nga kontrolahon ang mga water dispenser nga mikatap karon sa kadaplinan sa kadalanan ning dakbayan sa Sugbo.

Si Ralota kinsa maoy Presidente sa Association of Barangay Councils (ABC) nagkanayon nga makapabalaka kaayo ang kalimpyo niining tubig nga hulog-hulogan lang og peso kung dili kini masusi.

Wala hisayri kun limpyo ba ang tubig nga gibutang sa mga dispenser tungod kay kasagaran sa mga tag-iya niini wala hisayri kun asa mokuha og tubig nga ibaligya ngadto sa publiko, matud pa ni Ralota.

Base sa giduso niya nga ordinansa nga ginganlan niya og Vending Machine Ordinance, kini nagbuot nga dili basta-basta nga makapabarog ang usa ka negosyante og water vending machine sa kadalanan gawas kun makalukat siya og clearance, permit ug uban pa nga mga dokumento nga nagsubay sa sanitary code sa dakbayan.

Dugang pa ni Ralota nga kinahanglan usab nga mokuha ang mga negosyante og certification sa barangay, partikular na sa gibutangan nila sa ilang water vending machine nga magpamatuod nga tinarong nga pagsilbi sa publiko ang ilang baligyang tubig.

Gisaysay usab ni Ralota nga kung maaprobahan ang iyang giduso nga ordinansa, gikinahanglan gayud nga molukat og business permit gikan sa City Treasurer’s Office ang mga mosulod sa maong matang sa negosyo ug butangan usab kini og opisyal nga sticker.

Pipila sa mga panginahanglan nga gitinguha ni Ralota mao ang limpyo ug sihag nga sudlanan sa tubig ug may hustong basurahan sa kilid niini nga labayanan sa mga biya nga plastic nga isalibay sa mga tawong moinom sa tubig gikan sa usa ka dispenser.

Kinahanglan usab nga manginlabot ang City Health Department nga maoy tahasan sa pagpahigayon og random inspection sa mga vending machine pagsuta kun maayo ug makaayo ba sa lawas ang tubig nga naa sa maong dispenser.

Kung masuta nga depektoso ang maong dispenser kinahanglang dili magpanuko ang gobyerno sa pagpasira o kaha pagsakmit sa nahisgutang dispenser.

Gikinahanglan usab matud pa ni Ralota nga butangan og contact number sa mga tag-iya ang vending machine aron dali ra matawgan sa mga customer kung duna kini reklamo bahin sa tubig nga ilang nainom gikan sa water dispenser sa usa ka lugar.

Kinahanglan usab nga habwaon matag adlaw ang halin sa tubig aron malikayan ang shortage sa sensiyo. (WC)(BANAT NEWS)