CEBU, Philippines - Diriyot madunggabi ang usa ka sakop sa Squatters Prevention Encroachment and Elimination Division (SPEED) sa usa ka 15 anyos nga vendor nga gisakmitan niini og mga baligya sa asiras sa Natalio Bacalso Avenue kagahapon sa alas 2:00 sa hapon.
Ang biktima nailhan nga si Ramil Sario, 23, sakop kini sa SPEED team, samtang ang suspetsado usa ka 15 anyos nga bayong-bayong.
Sayo niini ang sakop sa SPEED nakadawat og report gikan sa City Traffic Operations Management kalabot sa nagdasok nga mga manindahay daplin sa karsada sa N. Bacalso Ave. nga nakamugna og kahuot sa trapiko.
Milihok dayon ang mga sakop sa SPEED ug si Sario maoy misakmit sa mga baligyang mga prutas sa 15 anyos nga vendor.
Ang suspetsado kinsa gibati og kapikal sa gibuhat ni Sario milanit sa iyang icepick ug gihansak kini kang Sario.
Maayo nalang kay abtik nga gisagang sa kauban ni Sario ang bukton sa suspetsado hinungdan nga wala masabak sa icepick si Sario.
Ang hepe sa SPEED nga si Noel Artes nagkanayon nga ang maong batan-ong buot untang moluba kang Sario usa ka sakop sa rugby boys kinsa nakaikyas human nila masikop sa miaging semana.
Gumikan kay menor de edad didto ihandos sa taga SPEED ang maong suspetsado sa buhatan sa Department of Social Welfare and Development (DSWD). (/WC) (BANAT NEWS)