CEBU, Philippines - Misamot kahanap ang gipaabot nga usbaw sa suholan sa mga mamumuo sa Central Visayas human nagtabla na usab ang gihimong botasyon kagahapon sa kadagkuan sa Regional Tripartite Wages and Productivity Board (RTWPB).
Nasayran nga sa gihimong tigom kagahapong adlawa sa mga sakop sa RTWPB subling nagbutohay kung aduna bay supervening condition nga nasinati karon sa rehiyon aron makatarunganon lang nga usbawan ang suhulan.
Ang pagsaka sa presyo sa lana nga nakaapekto na sa presyo sa palaliton ug uban pang batakang panginahanglan sa matag pamilya mao ang usa sa mga sanglitanan sa gitawag nga supervening condition.
Apan sa gihimong botasyon kagahapon migawas nga 3-2 ang botos, tulo ang wala motuong adunay supervening condition aron patas-an ang suhulan samtang duha usab niini ang miingon nga aduna gyu’y supervening condition karon.
Ang mga representante sa Department of Trade and Industry (DTI), management (mga negosyante) ug National Economic Development Administration (NEDA) mibotar nga walay supervening condition.
Samtang ang miingon nga adunay supervening condition mao ang duha ka representante sa labor ug si Exequiel Sarcauga nga maoy tsirman sa board nga nagrepresentar usab sa labor.
Niadtong unang panagtigom kapin usa ka semana na ang nakalabay midaog ang grupo ni Sarcauga sa 3-2 votes apan gikwestyon ang resulta sa botasyon tungod kay sa patakaran kinahanglang 3-plus one votes aron mamahimong pinal ang resulta.
Si Sarcauga nagkanayon nga human sa maong resulta nagplano sila karun nga modangop sa tulo ka lalawigan aron mohimo og konsultasyon kalabot sa maong problema.
Samtang ang tigpamaba sa Associated Labor Union (ALU) nga si Josefina Lim misaway sa plano sa RTWPB tungod kay daw nabali ang gihimo sa board imbes nga giuna ang konsultasyon una pa ang panagtagbo, matud niya hanap nang adunay usbaw. (BANAT NEWS)