Kadamay ngadto sa govt.: pag-ibot sa informal settlers kinahanglang naa nay relokasyon

CEBU, Philippines - Mga informal settlers dili supak sa pagbalhin sa ilang gipuy-an ilabi na kun anaa mahimutang ang ilang panimalay sa kuyaw nga lugar sama sa daplin sa sapa o nahimutang sa pangpang nga kuyaw sa pagdahili sa yuta.

Si Ramie Inopiquez usa sa mga opisyales sa Kadamay-Sugbu nga nahinabi sa Banat News niadtong miaging adlaw mipadayag nga kinahanglang adunay maayong kabalhinan ang mga mapapahawa sa ilang mga pinuy-anan.

Matud pa niya nga dili nila mabasol ang mga opisyal sa lokal nga kagamhanan nga mohingusog sa pagpabalhin sa mga informal settlers sanglit gitumong man sa ilang kasiguroan.   

“Kay kun ibton lang sa gobiyerno ang mga kabus nga nagpuyo sa kasapaan, unya wala masiguro asa sila ibutang labaw na hinuon nga mabutang sa kakuyaw ang ilang pagpuyo kay anha na man magligdas og higda sa daplin sa aseras,” pasabot pang Inopiquez.

Sa pagkakaron daghang mga panimalay daplin sa sapa sa Subangdaku ang gimandoang pabalhinon tungod sa peligro sa baha.

Samtang adunay mga molupyo sa barangay Tipolo ug sa Guizo nga gi-relocate kaniadto tungod sa Asean Summit ang wala na tabangi pa sa dakbayan tungod kay kaniadto gipapahawa na sila ug gibalhin sa barangay Canduman apan ilang gibaligya ilang mga pwesto ug namalik og tukod og balay sa mga aseras.

Dugang pa niya nga case to case basis gyud unta ang pagbalhin kanila, kinahanglang aduna nay nakaandam nga relocation site una pa ang demolisyon.