Gwen ug Mike miduyog sa mga negosyante

CEBU, Philippines -  Gitambongan ni Gobernador Gwen Garcia ang gilusad sa Cebu Business Club nga Public Private Partnership for better Infrastructure program didto sa Marco Polo Plaza Hotel sa miaging adlaw.

Ang nahisgutang programa gipaluyohan sa mga nagkadaiyang pribadong kompanya dinhi sa Sugbo.

Kining maong lakang gihimo aron mapalapdan pa ang panag-uban sa gobyerno ug pribadong kompanya alang sa kalamboan sa programa sa infrastraktura sa gobyerno dinhi sa dakbayan ug lalawigan sa Sugbo

Gisunod ang pagpirma sa Memorandum of Agreement lakip na ang Memorandum of Cooperation tali sa pribadong kompanya ug sa gobyerno nga gipangulohan ni Gov. Gwen Garcia.

Lakip usab nga mipirma mao si Cebu City Mayor Michael Rama, ug ang mga mayor sa lungsod sa Lilo-an, Consolacion, Cordova ug si Cebu City North District Rep. Cutie Del Mar.

Nasayran sa nahisgutang tigum nga si Gobernador Garcia ug Mayor Rama maoy pinasidunggang dinapit aron ikapakita sa mga pribadong magpapatigayon ang ilang mga nahimong proyekto dinhi sa Sugbo.

Gitataw ni Mayor Rama nga gipatigbabaw gyud niya ang pagtinabangay ug kanunay niyang gipadaplin ang politika kung hisgutan na ang pagserbisyo ngadto sa publiko.    (BANAT NEWS)