CEBU, Philippines - Nasakiyo sa mga wala hiilhing carnapper ang motorsiklo ug uban pang mga butang sa usa ka empleyado sa call center didto sa dalan Molave, sa barangay Camputhaw ning dakbayan sa Sugbo sa miaging kaadlawon.
Ang biktima nga nagtibi nga misumbong sa kapolisan mao si Maria Queenie Cruz Chavez, 22, dalaga, nga taga dalan Juana Osmeña, ning dakbayan. Si PO3 Jomar Vizcarra sa Fuente Police Station mibutyag sa Banat News nga ang biktima nagsakay sa iyang motorsiklo paingong mopauli sa ilang balay gikan sa iyang gitrabahoang call center.
Unya samtang nagdagan siya kalit lang may mitupad kaniyang duha ka lalaking wala hiilhi nga nagsakay usab og motorsiklo.
Apan sa iyang paglingi, gitionan na siya og armas de fuego sa nag-backride sa maong motor, hinungdan nga mipabulhot siya og padagan.
Apan matud pa gigukod siya unya gibabagan siya niini, busa miliko siya dihang nahipunta siya sa kanal busa naligid siya sa kanal.
Gikarnap dayon sa maong mga lalaki ang iyang motorsiklo diin didto usab ang iyang bag nga gisudlan og P5 mil, cell phone nga balor og P7 mil; driver’s license, ID ug uban pa.
Diha-diha misibat dayon ang mga carnapper samtang gibiyaan ang biktima nga wala unsaa busa nakasumbong dayon kini sa mga polis ug gipangita na karon sa mga otoridad ang maong mga carnapper.(WC) (BANAT NEWS)