CEBU, Philippines - Ang Arsobispo sa Sugbo nga si Jose Palma nag-organize og Church- Business Forum nga ipahigayon karong Mayo 18, 2011 gikan sa alas 2:00 sa hapon ngadto sa alas 5:00 sa hapon sa Harolds Hotel sa Gorordo Avenue, dakbayan sa Sugbo.
Ang tema sa maong forum mao ang “Retooling Church and Business For Social Responsibility Challenges”.
Ang nag-unang tumong sa forum mao ang bahin sa mga sunod-sunod nga kalihukan sa edukasyon/ formation sa business leader aron makakat-on ug matakos sila sa social teaching sa simbahan. Gilauman nga ang maong kalihukan usa sa paagi nga mapadayag dayon ang tumong ni Arsobispo Palma sa mga suliran sa mga negosyante ug professional nga katawhan sa tibuok archdiocese ug probinsiya.
Ang tukion sa forum mao ang kabahin sa corporate social responsibility ug ang main speaker niini si Arsobispo Palma.
Ang Archdiocesan Service Community of the Cebu Charismatic Communities ilabi na ang Couples for Christ, Brotherhood of Christian Businessman and Professionals ug Bukas Loob sa Diyos Covenant Community ang mosalmot sa pagpangandam sa forum. (BANAT NEWS)