CEBU, Philippines - Naputos sa samad dinunggaban ang patay’ng lawas sa usa ka lalaki nga napalgan sulod sa usa ka payag didto sa bukirang bahin sa barangay Tulang, lungsod sa Argao sa miaging buntag.
Ang biktima nailhan lang sa ngalang Bernard Bautista, hingkod, ug wala hisayri ang pinuy-anan.
Si PO1 Bernard Banugon sa Argao Police Station mibutyag sa Banat News nga ang biktima giingong nananghid pa kini sa usa ka Jaime Albarracin, ang tag-iya sa payag nga anha lang kini mopahuway nianang pagka gabii tungod kay nakainom kini.
Apan ang mga tawo nga nahiagi sa maong payag nga nahimutang sa daplin sa dalan maoy nakadiskobri nga patay na ang biktima.
Ang kapolisan nga mirespondi maoy nakadiskobre nga naputos sa samad tinigbasan ang lawas sa biktima gikan sa liog, tiyan ug dughan nga maoy nakaingon sa hinanali niyang kamatayon.
Ang kapolisan nakapunit og lagaraw kon sundang susama og gitas-on sa pinote nga nagkadugo og gituohang maoy gigamit sa kriminal sa pagpatay sa biktima.
Ang biktima may gitakon usab nga sanggot sa iyang hawak ug gikuha usab kini sa mga polis.
Ang kapolisan padayon pa sa ilang pag-imbistigar sa maong kaso. (WC) (BANAT NEWS)