Pagluto'g higanteng bibingka malampuson

CEBU, Philippines -  Giisip sa kagamhanan sa dakbayan sa Mandaue nga malampuson ang pagluto og higanteng bibingka bisan nalangay tungod sa kusog nga ulan.

Si Clark Pelaez , chairman sa committee sa maong kalihokan mibutyag sa mga tigbalita nga milungtad og 35 ka oras nga gidugayon una maluto ang tanang bibingka busa gipasagdan nila nga mga tawo nalay mokuha aron makakaon ang makakuha ug nagkaguliyang sulod sa sports complex ang tanan.

Gisalikway usab ni Pelaez ang pasangil nga nausik ang bibingka kay nahurot man kini og kaon sa mga tawo .

Matud pa ni Pelaez nga ang mga natagak nga bahin sa mga bibingka nga gikaon sa mga tawo susama lang sa momho sa usa ka kan-anan nga wala tuyoa sa pag-usik-usik sa nangaon.

Si Kristine Mayol Cortes nga sakop sa pamilya nga orihinal nga nagluto og bibingka miingon nga mitabang usab ang ilang pamilya uban sa kagatusan ka mga tinun-an ug mga   magtutudlo ug nalipay kaayo sila nga nahimong tipik ug kabahin sa makasaysayanong kalihokan nga pagluto ug higanteng bibingka.

Samtang si Mayor Jonas Cortes sa iyang bahin miingon nga ang kalampusan sa pagluto og higanteng bibingka sa dakbayan maoy pagpakita sa mga Mandauehanon sa kahiusahan ug pagkamainantuson alang sa pagkab-ot sa gitinguhang kalampusan.

Dugang pa ni Cortes nga nasud-ong niya ang gipakitang kaikag sa mga Mandauehanon sa paningkamot nga molampos ang maong proyekto nga gipasiugdahan sa kagamhanan sa dakbayan. (BANAT NEWS)