Umento sa suhulan desisyunan karon

CEBU, Philippines - Mahibaw-an karung adlawa kun duna bay aprobahang umento sa suholan alang sa mga mamumuo dinhi sa Sugbo ug sa tibuok Central Visayas nunot sa subling panagtagbo sa mga sakop sa Regional Tripartite Wages and Productivity Board RTWPB-7.

Matud ni RTWPB acting chairman Exequiel Sarcauga ug kasamtangang acting regional director sa Department of Labor and Employment (DOLE-7) ilang hashasan og maayo ang duha ka pending nga petisyon alang sa gipangayo nga usbaw sa suholan.

Ang Alliance of Progressive Labor (APL) maoy unang miduso og petisyon nga nangayo og P120.40 nga umento sa suholan ug gisundan sa Associated Labor Union ALU-TUCP sa ilang P100 across the board increase sa mga kawani dinhi sa Sugbo.

Apan matud ni Sarcauga nga ilang paningkamotan nga balansi ang makab-ot nilang desisyon ug rekomendasiyon ngadto sa ilang ulohang buhatan aron pagsiguro nga walay madehado gikan sa sektor sa pamuo ug management.

Matud ni Sarcauga tutukan nila sa subling panagtagbo sa mga sakop sa board karung adlawa kun duna bay supervening kun balidong mga katarungan aron aprubahan ang gipangayong umento sa suholan.

Apil sa gidapit ang representante gikan sa Department of Energy (DOE), National Development Authority (NEDA), Department of Trade and Industry (DTI) ug ang mga representante sa mga kompaniya sa lana. (BANAT NEWS)