Tungod sa kandila, balay naugdaw

CEBU, Philippines -  Tungod sa kandila, naugdaw ang dos andanas nga balay sa barangay Upper Mohon, dakbayan sa Talisay sa miaging buntag

Ang tag-iya sa nasunog nga balay mao si Carlo Gino Anthony Saniel.

Sa pakighinabi sa Banat News ni SFO3 Marcial Vilvestre, Talisay Fire Investigator nasayran nga sa wala pa ang sunog ang magtiayon ug ang ilang mga anak namahaw sa silong nga bahin sa balay.

Apan samtang nangaon sila natingala ang magtiayon kay nagkidlap kidlap man ang ilang suga.

Unya mao nalay nadiskobrehan nila nga miaso na ang taas sa ilang balay ug nasunog busa dali silang migawas.

Matud pa ni Vilvestre dali kaayong naugdaw ang semi-concrete nga balay ug walay nadala bisan usa ka butang ang mga biktima.

Nasayran gikan kang Vilvestre nga si Saniel mitug-an kaniya nga nagtuo kini ang kandila nga wala mapalong sa taas sa ilang balay maoy sinugdanan sa sunog.

Kini tungod kay kada buntag mangadye gyud ang iyang asawa sa ilang Santos nga adunay kandila sa altar .

Apan matud ni Vilvestre nga gawas sa kandila, sutaon usab nila ang air conditioning unit niini kun dili ba maoy hinungdan sa maong sunog.

Ang maong sunog gibana-bana nga nakontrolar sulod sa dos minutos ubos sa first alarm.

Hinuon walay kinabuhing naangin sa maong sunog. (BANAT NEWS)