CEBU, Philippines - Nakabsan sa kinabuhi ang usa ka lalaki human makaligis og iro sa usa ka likoong karsada sa barangay Poblacion, lungsod sa Alcantara sa miaging Domingo sa gabii.
Ang biktima mao si Jonas Ricablanca, hingkod, ulitawo ug residente sa Barangay Maghanoy, lungsod sa Barili.
Base sa inisyal nga imbestigasyon sa Alcantara Police Station, nasayran nga ang biktima nagsakay sa iyang XRM Motorcycle nga may angkas paingon sa Alcantara gikang nanan-aw og duwa nga basketball sa lungsod sa Moalboal.
Dihang pag-abot niya sa blind curve nga karsada atubangan sa Alcantara Parish Church, milabang ang usa ka iro ug iyang naligsan hinungdan nga nawad-an siya og kontrol sa iyang sakyanan.
Misukarap ang biktima uban sa iyang motorsiklo nga nalamba, samtang pagtugpa niya nabagdok ang iyang ulo sa sementadong karsada.
Matud pa ni PO1 Fortunato Mamac sa Alcantara Police Station nga daling gihatod ang biktima sa iyang mga kabanay ngadto sa Barili District Hospital diin kini gideklarar nga dead on arrival.
Hinuon ang iyang angkas walay bun-og, sumala sa kapolisan. (BANATNEWS)