Pundo sa SK gisugyot nga gamiton alang sa kinaiyahan

CEBU, Philippines - Gitinguha karon nga ang pundo sa Sangguniang Kabataan gamiton alang sa mga programa sa Climate Change Adaptation.

Si Senador Loren Legarda, pangulo sa Senate Committee on Climate Change, gikatakda nga moduso sa People’s Survival Fund Bill diin ang pundo sa SK usa sa gitan-aw nga gamiton.

Matud pa ni Legarda nga ang 10 porsiyentong pundo sa SK gikan sa barangay mapuslan kung gamiton sa mga proyekto nga mabungahon ug malungtaron nga makapanalipod sa kinaiyahan.

Gisaway ni Legarda nga ang kadaghanan sa mga gidapatan sa pundo sa SK sama sa paggamit niini alang sa mga nagkalainlaing indigay diha sa tagsatagsa nila ka barangay ug walay benepisyo nga makuha ang publiko samtang ang kinaiyahan inanay nga namatay.

Sa pagduso sa maong balaudnon, sumala pa ni Legarda nga ang pundo kuhaon gikan sa nagkalainlaing ahensiya sa gobiyerno lakip na ang makolekta gikan sa Motor Vehicle Users Charge.

Lakip sa iyang gidasig ang pribadong mga pundok sa pagtunol usab sa ilang mga donasyon alang sa maong programa sa gobiyerno.  - BANAT NEWS