Mga ilegal nga kalihokan gibantayan

CEBU, Philippines - Gihingusgan sa pagbantay sa kapolisan ang upat ka barangay sa dakbayan sa Lapulapu nga naglakip sa barangay Punta Ingano, Mactan, Maribago ug Pajac batok sa illegal nga kalihokan sa kadagatan ug illegal nga drugas nga dugay nang naglihok sa maong lugar, matud pa ni Senior Inspector Junel Kaadlawon, hepe sa Presinto 2 nga nagbase sa barangay Mactan.

Si Senior Inspector Kaadlawon miingon nga pipila niini mao ang palusot sa mga mahalong gasang, illegal nga panagat nga gigamitan og dinamita ug labaw sa tanan ang palusot sa ginadiling drugas.

Dugang pa niya nga ang mga sakop sa Task Force Kalikasan nga gilangkoban usab sa mga sakop sa kapolisan maoy nanghingusog aron masumpo kining maong mga kalapasan.

Gitataw niya nga miabag usab kanila ang mga barangay tanod nga sakop sa Unified Task Force (UTF) nga giumol sa kagamhanan sa maong dakbayan. - BANAT NEWS