2 gidunggab sa rambol sa Street party sa Lapulapu

CEBU, Philippines - Gipangdunggab ang duha ka mga batan-on atol sa Kadaugan Street Party (KSP) kagahapon sa kaadlawon sa sitio Mustang barangay Pusok dakbayan sa Lapulapu apan nangangkon ang mga organizers nga malampuson gihapon ang maong selebrasyon.

Ang biktima mao si Luigi Taneo Igot, 18, residente sa sitio Soong Bagong Bayan, sa Mactan dakbayan sa Lapulapu ug Lemuel Igot Delda, 18, residente sa barangay Pajac dakbayan sa Lapulapu.

Sa pasiunang imbestigasyon ni SPO3 Jesus Gemenia nasuta nga mga alas 5:30 kagahapon sa kaadlawon atol sa nagpadayong disco sa dalan ML Quezon national highway nahitabo ang panag-initay sa mga grupo sa mga batan-on.

Pipila ka gutlo nahitabo ang rambol sa grupo ni Igot ug sa laing mga batan-on ug misantop sa pagpanunggab.

Si Igot nahiagom og samad dinunggaban sa iyang tiyan, samtang si Delda samaran sa iyang ulo gikan sa mga batan-on.

Dali nga gidala ang duha sa Lapulapu City District Hospital apan si Igot gibalhin kini sa Vicente Sotto Memorial Medical Center gumikan sa kritikal nga kahimtang niini.

Hangtod ning pagbalita wala pa mailhi sa kapolisan ang mga responsableng batan-on sa pagpanunggab. (BANAT NEWS)