Lamiang potahe giladlad sa food festival

CEBU, Philippines - Nagkadaiyang mga potahe sa pagkaon nga hinikay sa mga hotel, beach resort ug mga restaurant sa dakbayan sa Lapulapu natilawan sa mga dumuduong sa pagbukas sa Food Festival sa Kadaugan Sa Mactan (KSM) sa milabay’ng gabii.

Ang pormal nga pagbukas sa KSM gipangulohan ni Lapulapu City Mayor Paz Corro Radaza ug ang mga tag-iya ug tagdumala sa mga hotel, resort ug restaurant uban sa ilang presidente nga si Embler Mendoza ang manager sa Waterfornt Hotel and Casino Mactan.

Gisugdan ang maong kalihukan pinaagi sa usa ka ribbon cutting sa atubangan sa monumento ni Datu Lapulapu ug gisundan kini sa mga makalingaw nga pasundayag ug tukar sa usa ka live band.

Matud pa ni Mayor Radaza nga dako ang iyang kalipay sa suporta sa mga dagkong hotel, resort ug restaurant nga namatigayon sa dakbayan sa Lapulapu nga naghatag og dugang kamabulokon sa maong kalihokan.

Namatikdan usab sa kadaghanan nga miusbaw na ang gidaghanon ning higayona sa maong food festival nga may gidugayon nang napulo ka tuig hangtod karon.

Si Mendoza sa iyang bahin mapasalamaton usab sa 45 ka mga nagkalainlaing establisamento nga misalmot sa nahisgutang food festival diin ang 14 niini pulos mga dagkong hotel ug resort sa dakbayan sa Lapulapu, sama sa Warterfront hotel, Shangrila Hotel and SPA Mactan, Imperial Palace, Hilton Hotel ug uban pa.

Matud pa ni Mendoza nga sa milabay’ng tuig mikabat ra sa 33 ka mga establisamento ang misalmot sa maong festival, apan karong tuiga mas midaghan gumikan sa ilang gugma sa unang bayani sa nasud nga si Datu Lapulapu.

Misalmot usab bisan ang mga gagmay’ng patigayon sa kan-anan nga mipatilaw usab sa ilang mga lamiang potahe ngadto sa katawhan.

 Ang KSM food festival magpadayon hangtod sa Abril 29 diin ang tanang katawhan nga buot mokaon makapahimus sa barato nga presyo sa pagkaon nga ginama sa mga dagko ug gagmay’ng kan-anan sa maong dakbayan.  - BANAT NEWS