CEBU, Philippines - Kapin sa 6 mil ka mga pulis ang gipakatap sa tibuok rehiyon siyete atol sa kasaulogan sa Semana Santa, sumala pa ni PRO-7 Chief Supt. Ager Ontog atol sa Talakayan sa Isyung Pulis (TSIP) Forum kagahapon sa buntag diha sa media center sa PRO-7.
Matud ni Ontog nga 90 porsiyento sa kapulisan sa Central Visayas ang anaa makita sa kadalanan, pantalan, mga beach resorts aron masiguro ang seguridad.
Kagahapon sa alas-2 sa hapon si Ontog mipahigayon og surprise inspection sa tanang police assistance centers sa mga major terminals, pantalan dinhi sa dakbayan ug Mactan Cebu International Airport (MCIA) aron sutaon kun duna bay nasugatang problema ang kapulisan.
Si Sr. Supt. Jene Bracamonte, hepe sa Maritime Central Visayas nagkanayon nga nagbutang usab sila og passenger action centers diha sa mga pantalan, sama sa pier 1,3,4, pantalan sa Hagnaya lungsod sa San Remegio,Tagbilaran ug uban pa nga dunay exit point paingon ngadto sa laing probinsya.
Mopahigayon usab sila og seaborn patrol gikan diha sa tiilan sa First Mactan Bridge paingon ngadto sa dakbayan sa Talisay.
Samtang si Sr. Supt. Romeo Ver, hepe sa Highway Patrol-7 mibutyag nga nagbutang sila og siyam ka motorist assistance centers diha sa Guinsay Danao, Yati Liloan, Minglanilla, Carcar, Toledo, Dumaguete, Tagbilaran, Cebu South Bus Terminal ug North Bus Terminal.
Matud ni Ver nga dili sila manakop sa mga motorista nga nakahimo lang og gamay nga kalapasan sa lagda sa trapiko. Inay ilaha hinuon tabangan kun unsay masugatan nga probelma.
“I specifically instructed my men to avoid apprehending minor traffic violations. We will be assisting motorists, not more apprehension but more on helping motorist,” matud pang Ver. - BANAT NEWS