CEBU, Philippines - Nasakmit ang mga linikit nga pinaugang dahon sa marijuana gikan sa tulo ka mga lalaki dihang nadakpan kini sa akto sa kapolisan nga naghithit niini didto sa sitio Maharlika sa barangay Tipolo, dakbayan sa Mandaue sa miaging gabii.
Ang gipangsikop mao sila si Christian Mabini Salgado, 19, George Suano, 19 ug usa ka 17 anyos nga lalaki.
Si PO1 Roldan Daligdig sa Investigation Detection and Management Bureau (IDMB) sa kapolisan sa Mandaue nga nahinabi sa Banat News miingon nga nagpatrolya ang team sa IDMB nga gipangulohan ni Inspector Ramil Morpos sa maong higayon , dihang pag-agi nila sa maong dapit kalit lang mialibwag sa pagpanagan ang grupo sa mga batan-on.
Dugang pa niya nga ang tulo nga naghithit sa linikit nga marijuana wala dayon makalihok kay nakalitan busa dali kaayong nasikop sa kapolisan.
Uban sa ilang pagkasikop, gisakmit usab sa mga otoridad ang tulo ka linikit nga marijuana nga ilang gigamit sa paghithit.
Gibalhog karon ang tulo ka dinakpan aron pasakaan og kaso nga paglapas sa Republic Act 9165 kon Dangerous Drugs Act of 2002. (BANAT NEWS)