CEBU, Philippines - Usa ka ginang nga giduka luwan sa jeepney gikan sa Danao padulong sa dakbayan sa Sugbu ang gibunalan sa agtang sa mga tulisan nga mibiktima kanila pag-abot sa barangay Cansaga, lungsod sa Consolacion sa miaging gabii.
Ang biktima mao si Ding Barrios Mirafuentes, 28, nagpuyo sa Buenavista Homes sa barangay Jugan sa nahisgutang lungsod kinsa nakuhaan sa wala pa matinong kantidad, duha ka cellphone ug mga importanteng ID.
Tulo ka mga batan-ong lalaki ang gitumbok sa biktima nga mitulis ug mipasakit kaniya samtang paingon sa dakbayan sa Sugbo gikan sa Danao.
Ang biktima nga naglingkod dapit sa pultahan sa PUJ ug giduka tungod sa kakapoy ug wala makadungog sa pagdeklarar og tulis maong gidukdok siya sa puloan sa armas diha sa agtang.
Human makuha iyang shoulder bag daling nangambak ang mga tulisan samtang ang ubang pasahero wala makuhai sa ilang mga butang.
Samtang duha ka gipasanginlang carnapper og motorsiklo ang nadakpan sa barangay Cantabaco sa dakbayan sa Toledo niadtong Miyerkules sa buntag.
Ang nadakpan mao sila si Rommel Bacalso ug Juphil Cañete pulos taga Inayawan sa dakbayan sa Sugbu human magduda ang tawong ilang gibaligyaan unta sa ilang gikarnap nga motorsiklo nga usa ka Honda XRM-110 nga may plakang 548-GD.
Nagduda ang maong pumapalit tungod sa ka barato sa pagbaligya niini hinungdan nga mitawag kini sa mga polis ug sila si PO2 Benjo Pat, PO2 Jordan Supatan ug PO1 Florante Cayson daling miresponde ug misikop sa duha.
Ang duha gi-turnover na sa Pardo Police Station sa dakbayan sa Sugbu sanglit adunay nagpa-blotter sa maong police station nga gikawatan og motorsiklo. (EIM) (BANAT NEWS)