Drayber sa PUJ nasuwaw sa suga motorsiklo gidumbol, lola patay upat naangol

CEBU, Philippines -  Patay ang usa ka inahan ug upat ang nangaangol nga naglakip sa iyang apong babaye nga nagpangidaron usa pa ka tuig human ang ilang gisakyang motorsiklo nadumbolan sa PUJ sa miaging alas-8:50 sa gabii diha sa Rosal St., sa barangay Camputhaw siyudad sa Sugbu.

Ang namatay nga inahan mao si Vevencia Catacutan, 52; Joselito, 29; anak ug maoy drayber sa motorsiklo, Shiela Mae, 13; Luigi, 8; ug ang usa pa ka tuig niini apo, pulos nagpuyo diha sa La Guerta sa barangay Lahug.

Samtang ang nakadumbol kanila mao ang 04C nga PUJ nagtangag sa plakang GVS-228 nga gimaneho ni Lariano Belono, 62, taga barangay Ilaya sa lungsod sa Dumanjug.

Si Belono nga nahinabi sa Banat News mitug-an nga gikan siya sa downtown area ug padulong sa Lahug ug pag-abot sa Asilo dela Milagrosa Parish mikanaog ang iyang usa ka pasahero ug milahos nalang siya sa Lahug aron mogarahe.

Apan pag-abot diha sa duol sa Rosal St. nakalitan siya pag- overtake sa motorsiklo hinungdan nga mi- brake siya apan naigo gyud niya ang motorsiklo.

Gibasol ni Belono ang kasuwaw sa suga sa mga sakyanang gikasugat ug pag-apply niya og brake iyang nawiktan ang gasolinador ug nakaingon sa pagkalagpot sa mga biktima.

Tungod sa gikusgon sa impact ang mga biktima nangalagpot sa karsada nga nakaangkon og grabeng kadaut sa ilang kalawasan ug ulo. Ang mga tanod sa Camputhaw daling miresponde sa nahitaboan ug gidali pagpasakay sa multicab sa barangay ug gihatud sa Cebu City Medical Center (CCMC).

Si Joselito nga nakaangkon og samad sa iyang ulo nga nahinabi sa Banat News mitug-an nga iyang gikuha ang iyang ginikanan ug igsuon diha sa Carreta Cemetery nga naninda og kandila aron iyang ihatud unta sa ilang pinuy-anan diha sa La Guerta.

Matud niya wala na siya makabantay nganong nadumbolan sila. Nagduda ang kapulisan nga nakainom usab si Joselito niadtong higayona apan hugot kining gihimakak sa naulahi.

Ang iyang inahan nga nagrabihan nakabsan sa iyang kinabuhi pasado alas-11 na sa gabii subay sa blotter sa City Traffic Operation Management (Citom).

Kagahapon sa buntag gipagawas na sa detention cell si Belono human ang mga kabanay sa mga biktima dili na interesadong mopasaka og kaso batok kaniya. (BANAT NEWS)