Taiheiyo Cement miabag kang Gwen

CEBU, Philippines - Ang presidente sa Taiheiyo Cement Corporation mihatag og kurtersiya sa buhatan ni Gobernador Gwendolyn Garcia sa miaging adlaw.

Si Satoshi Asami sa iyang pakighinabi sa gobernador, gilakbit-saysayan sa naulahi kalabot sa plano niyang pagpatukod og mga tulunghaan diin kaabag ang Taiheiyo Cement sa pagdonar og semento. Si Asami nga maoy mihulip kang Hiroshi Harada sa pagdumala sa Taiheiyo miingon nga bilib kaayo siya sa programa sa gobernador hinungdan nga ubos sa iyang administrasyon iyang ipadayon ang pagsuporta sa maong programa.

Nahisgutan usab ni Asami ang nagkalainlaing laraw sa ilang kompaniya sa pagsuporta sa mga lokal nga kagamhanan ilabina sa natad sa pagpalambo sa edukasyon.

Kahinumdoman nga ubos sa kasamtangang administrasyon ni Garcia, gihatagan niini og dakong pagtagad ang sektor sa edukasyon.

Gani kapin na sa 600 ka mga classroom ang napatukod niya sa tibuok lalawigan sukad sa iyang paglingkod isip gobernador sa lalawigan sa Sugbo. (BANAT NEWS)