CEBU, Philippines - Gidungog kagahapong adlawa ang hearing sa motion to quash search warrant sa buhatan ni RTC-7 Branch 13 Judge Mendrado Paredes diin lahing Bella Ruby Santos ang mipatim-aw sa korte.
Apan atol sa taas kaayong pagdungog sa kaso mitumaw ang tension tali sa kampo sa akusado ug sa mga sakop sa Criminal Investigation and Detection Group-7 human ang abogadong si Ana Luz Crystal mibarog ug mibadlong sa mga sakop sa CIDG nga giingong mi-briefing sa mga testigo.
Atol sa maong hearing gipresentar sa witness stand ang tulo ka witness sa CIDG-7 nga sila SPO2 Wilard Selebio, Supt. Fermin Armendares ug ang nakakita sa paglabay kang gituohang si Ellah Joy Pique ngadto sa bung-aw nga si Ligaya Escultos.
Giklaro sa duha ka sakop sa CIDG nga ilang gi-apply ang search warrant sa panimalay ni Bella Ruby Santos base usab sa mga nakuha nila nga mga saksi.
Samtang si Escultos miinsister nga iyang nakit-an ang langyaw nga hinigugma ni Santos nga si Griffifh nga anaa sa likod nga bahin sa SUV gihulagway niya nga kadudahan kaayo ang lihok.
Dugang pa ni Escultos nga sa diha nga miagi na sila sa tungod gitan-aw sila sa langyaw hinungdan nga nakamay-ong siya niini.
Pipila usab sa mga testigos ang wala magkaparehas ang mga pamahayag atol sa cross examination sa nahauna nilang gibuhiang pamahayag sa buntag kumparar sa ilang pamahayag pagkahapon.
Sa report sa Balitang Bisdak, gihulagway nga daw adunay kausaban sa mga gipangbutyag sa mga saksi diin giingong adunay napuno niini nga maoy hinungdan sa pagkalangay sa maong eksaminasyon sa korte.
Samtang wala usab dawata sa piskalya ang kasong perjury nga gisang-at sa kampo ni Santos batok sa upat ka testigo nga mao silang SPO2 Wilard Selebio, Supt. Fermin Armendares, Ligaya Escultos ug ang kuyog niini nga si Richard Ian Bruce Bansuan tungod sa kakulang sa mga rekisitos.
Karong adlaw’ng Lunes ipahigayon ang sunod nga hearing sa maong kaso diha gihapon sa sala ni Judge Meinrado Paredes. - BANAT NEWS