CEBU, Philippines - Pulos nalandig sa tambalanan ang duha ka lalaki human kini panunggaba sa ilang kontra atol sa rambol nga nahitabo sulod sa imnanan sa sitio Wireless, Brgy. Subangdako, dakbayan sa Mandaue sa milabay’ng gabii.
Ang mga biktima mao sila si Mario Cuyos, 54, minyo, ug Carlos Satur, 55, minyo, nga taga Sitio Fatima -Malibo, Subangdaku, samtang ang suspetsado naila nga si Darwin Perez, 37, nga silingan sa mga biktima.
Base sa imbestigasyon sa kapolisan sa Station 2 sa Mandaue City Police Office (MCPO) nasuta nga mga alas 7:30 sa milabay’ng gabii sulod sa usa ka tindahan nag-inom ang grupo ni Cuyos, samtang sa laing lamesa ang grupo usab ni Perez maoy naglingkod.
Unya kalit mitumaw ang lalis sa duha ka grupo dihang giingong gipuspos ni Perez ang butanganan sa balon.
Si Cuyos nga nasagmuyo misita kang Perez ug didto nagsugod ang mainitong lalis tali sa duha nga misangpot sa karambola sa duha ka grupo.
Unya si Perez nga may kutsilyo midunggab sa duha ug nasabak si Cuyos sa baba , samtang si Satur naigo usab sa tiyan.
Ang duha ka mga biktima dali nga gidala sa Mandaue City Hospital samtang gipangita sa kapolisan si Perez human kini mosibat.
Sa pagsuwat ning maong balita may gisikop ang kapolisan nga usa ka lalaki nga nagdala og kutsilyo ug gisukit kun may labot ba kini sa karambola nga miangol kang Cuyos ug Satur. - Bong Soriano ug Romeo Limpangog/WC (BANAT NEWS)