Rico J. nangayo'g pasaylo kang Gwen

CEBU, Philippines - Ang beteranong singer nga si Rico J. Puno nangayo og dispensa kagahapon kang Gobernador Gwendolyn Garcia human kini mangomedya og sakit nga komedya sa gobernador.

Ang pangomedya ni Puno nga gikahiubos sa gobernador nahitabo sa pagbukas sa usa ka hotel sa dakbayan sa Mandaue diin usa ang gobernadora sa pinasidunggang dinapit.

Si Puno kinsa usa usab sa mga bisita mihalad og kanta unya giharanahan niya ang gobernadora apan milakbit kini sa pagsulti nga “Vicky Belo ba yan o doctor Calayan” hinungdan nga ang mga tawo nga nanan-aw misuliyaw.

Si Puno sa phone interview niini sa TV Patrol Central Visayas nagkanayon nga “with due respect to the governor, pasensiya na ho governor, natuwa ako sa’yo dahil napakaganda mo talaga”.

Gipasabot ni Puno nga ang sitwasyon sama sa showbiz diin sa Manila maghisgot sila kabahin nila si Dr. Belo ug Calayan.

“I am really very, very happy to see her because she looks so good and I respect her”, ni Puno pa.

Matud ni Puno nga niadtong higayona gikan siya sa Davao mianhi lang siya og Cebu tungod sa imbitasyon sa iyang higala.

Unya ang Provincial Board miduso dayon og resolusyon sa pagdeklarar kang Puno nga usa ka persona-non-grata nganhi sa Sugbo.

Apan ang maong resolusyon gibakwi ni Bokal Adelino Sitoy.

Si Garcia kagahapon sa interview sa mga sakop sa media sa iyang reaction kabahin sa gisulti ni Puno mi-posing-posing kini sa mga camera ug nagkanayon nga aduna siya’y marekomendar kang Puno nga mga lokal nga mga beauty surgeon nga mga maayo. (Brenda D. Batuto) (BANAT)