Ginang nadakpan sa drug bust
CEBU, Philippines - Nagtingkagol karun sa karsel ang usa ka gipasanginlang level two drug pusher nga ginang human kini masikop sa grupo sa Provincial Anti-illegal Drugs Special Operations Task Group (PAIDSOTG) sa dalan F. Ralota barangay Poblacion syudad sa Danao sa miaging adlaw.
Ang nasikop mao si Flordeliz Mata, 35, ug molupyo sa maong lugar kinsa nakuhaan og gituohang ginadiling drugas nga nagkantidad og P15 mil sa grupo ni Supt. Teofilo Siclot.
Si Siclot, ang deputy provincial director for operations ug mga sakop armado sa search warrant nga gipirmahan ni Judge Marilyn Yap sa Regional Trial Court Branch 28, Mandaue City.
Matud pa ni Siclot nga si Mata ilang gipaubos sa surveillance sulod sa pipila na ka semana tungod sa impormasyong namaligya kini og ilegal nga drugas sa maong lugar.
Atol sa maong operasyon sa panimalay ni Mata naabtan sa kapolisan ang tulo ka tawo nga ilang gituohang mamalitay usab kini og shabu apan wala dakpa sanglit walay nakuhang ebidensya batok kanila.
Usa ka medium pack ug usa ka small pack nga may sulod nga gituohang shabu ang nasakmit gikan kang Mata.
Butyag usab ni Siclot nga base sa ilang nakuhang impormasyon nga si Mata maghaturan og shabu sa Leyte gikan sa lima ka gramo hangtud usa ka kilo apan kini gihimakak ni Mata. (BANATNEWS)
- Latest
- Trending
