CEBU, Philippines - Nalangan ang pagpatuman sa gilaraw nga socialized housing sa mga eskuwater nga nagpuyo sa kabarangayan sa dakbayan sa Mandaue.
Kini tungod kay wala pa kabayri sa kagamhanan sa dakbayan ang relocation site nga may gidak-ong 6.5 ka ektarya nga katukoran sa maong mga balay nga nahimutang sa barangay Paknaan sa maong dakbayan.
Si Emmanuel Arong nga maoy officer in-charge sa Housing on Urban Development Office (HUDO) miingon nagpanikad na sila nga kabayran sa kagamhanan ang maong luna aron iplastar na ang mga kabalayan sa mga kwalipikadong papuy-on niini.
Ang mga tigpaniid nagkanayon nga di lagi magsilbi nang magpunay lang og plano apan walay buhat, kinahanglang ang pagpanikad nga matuman ang maong plano ubanan gyud og aksyon aron nga makompleto ang maong laraw.
Si Mayor Jonas Cortes miingon mao gyu’y iyang damgo nga matuman ang maong proyekto aron makapuyo ang kapin 2,000 ka mga kabus nga walay mga balay.
Dugang pa niya nga nag-una nga makapahimulos sa maong proyekto mao kadtong mga kabus nga nagpuyo sa kuyaw nga lugar sama sa sapa, kanal nga kanunay nga nakasinati og kahasol sa pagdako sa tubig.
Si Cortes miingon nga iyang ipaubos sa Community Mortgage Program (CMP) sa kagamhanan ang maong proyekto ug magbayad sa ubos lamang nga presyo ang mga benepisyaryo niini. (BANATNEWS)