18MW ang nadaginot atol sa usa ka oras nga Earth Hour - VECO

CEBU, Philippines - Mas dako ang nadaginot nga kuryente dinhi sa Metro Cebu human sa gipahigayon nga usa ka oras nga Earth Hour niadtong Sabado sa gabii nga diin gipawong ang tanang ‘essential lights’ sa nagkadaiyang establisamento ug mga panimalay sulod sa usa ka oras.

Matud pa sa tigpamaba sa Visayan Electric Company Ethel Natera nga dako og nadaginot ang VECO tungod sa kadaghan sa mga misalmot sa Earth Hour.

Ang Earth Hour gisugdan alas 8:30 sa gabii kutob sa alas 9:30 sa gabii ug daghang mga dagkong kompanya ug establisamento ang nangapil.

Nasayran nga pagsugod sa Earth Hour, alas 8:45 naminos ang kuryente sa 257.1 megawatts, sa diha nga pag alas 9 na miminus na usab kini ngadto sa 254.68 megawatts, alas 9:15 mi-us-os pa kini ngadto sa 249.76 megawatts, samtang nianang pagka alas 9:30 miminus kini ngadto sa 248.89 megawatts.

Sa suma total, si Natera nagkanayon nga nakadaginot ang franchise area sa VECO sa kinatibuk-an og 18 megawatts.

“Earth Hour Results: The highest load drop in the VECO franchise area was 18 MW.” matud pa sa Facebook account sa VECO.

Mipasabot usab si Natera nga ila gayud nga gi-monitor ang kada makuhang kuryente atol sa pagsaulog sa Earth Hour.

Ang Earth Hour gisugdan sa nasud sa Australia sa siyudad sa Sydney niadtong 2007 diin 2.2 milyones ka panimalay ang boluntaryong mipawong sa ilang mga suga agi og pagpahinumdom sa katawhan sa kamahinungdanon sa pag-amping sa kinaiyahan nunot niining padayong pagkaguba niini tungod sa polusyon.

Sa report sa ABS-CBN News.Com, ang League of Cities ug League of Municipalities sa tibuok nasud mipahibalong adunay 1661 ka mga syudad ug munisipalidad nga miapil sa maong mabulukong kalihukan.

Ang department of Energy Secretary Rene Almendras maoy nangulo sa pagpasiga sa official candle gawas nga bahin sa Mall of Asia sa syudad sa Pasay diin gisundan usab kini sa presidente sa The Philippines’s Climate Change Commission.

Samtang si United Nation Secretary General Ban Ki-moon mao usab ang nangulo sa mga civic leaders pagsuporta usab sa pagsaulog sa Earth Hour.

“All over the world individuals, communities, businesses and governments are creating a new examples for our common future-new visions for sustainable living and new technologies to realized it”, pasabot pa ni Ban Ki-moon. - BANAT NEWS