Miyabo og tuba sa kainom nakit-an nga patay naputos og dinunggaban

CEBU, Philippines - Patay nang nakit-an ang lawas sa usa ka mag-uuma nga naputos sa samad dinunggaban ang kalawasan ug liog nga gilabay daplin sa pangpang sa bukirang bahin sa barangay Salog sa lungsod sa Dalaguete sa milabay’ng adlaw sayo sa buntag. Ang biktima mao si Elmer Rivera Pia, 32, nagpuyo sa maong lugar samtang ang kapulisan padayon pa sa ilang imbestigasyon pagtumbok sa mamumuno.

Matud ni PO2 Franklin Dian, imbestigador sa Dalaguete Police Station dihang nahinabi sa Banat News mibutyag nga napalgan ang patay’ng lawas ni Pia sa iyang pag-umangkon nga si Terro Pia Selituna, 17, diha na daplin sa pangpang gibana-banang 300 metros gikan sa Salog Elementary School.

Nasuta nga gikan mitambong sa usa ka anibersaryo sa minatay ang biktima diin tungod sa kahubog usa ka bisita nga giila lang sa pangalan nga Zaldy ang iyang gibuboan og usa ka gallon ug usa ka petsel nga tuba, wala pa gyud matagbaw gipusposan niya kini og kahoy hinungdan nga mikaratel si Zaldy og dagan.

Ang kapulisan padayun pa sa ilang imbistigasyon pagpanghipos og ebidensya aron matumbok kun si kinsa ang responsable sa krimen. (BANAT NEWS)