CEBU, Philippines - Usa ka barkong iggugubat sa Estados Unidos nga mao ang USS Gridley (DDG-101) ang mi-angkorahi sukad niadtong Miyerkules sa hapon diha sa kadagatan sa Talisay nga una nang gituohang moapil sa re-enactment sa pagsaulog sa ika-66 nga ‘Takas sa Talisay’ karong Sabado.
Apan giklaro dayon ni Ensign Joseph Ison sa Naval Forces Central (NAVFORCEN) nga dili moapil sa re-enactment ang maong warship.
Gibutyag ni Ison nga ang maong barko usa ka guided-missile destroyer ug sa pasiunang report nga ilang nadawat kagahapon sa buntag gikan sa headquarter sa Philippine Navy sa Manila ang maong barko mopundo nganhi sa Sugbo sulod sa lima ka adlaw.
Sa oras sa pagsuwat niining balita matud ni Ison nga wala pa silay nadawat nga report kung diin gikan ug asa ang sunod nga destinasyon sa barko.
Matud usab ni Ison nga tungod sa kadako sa maong barko mangita kini og mapundohan tungod kay dili kini pweding moangkorahi ngadto sa Mactan Channel tungod kay makahatag kini og traffic diha sa pwerto.
Hinuon si Ison nagkanayon nga kasagarang tumong sa pag-angkorahe sa usa ka barkong iggugubat mao ang pagpalit og suplay sama sa pagkaon.
Apan adunay mga report nga giingong nagpahigayon og rest and recreation ang mga tripulante niini dinhi sa Sugbu.
Ang USS Gridley may gitas-on nga 155.30 meters (gikan sa dulong paingon ngadto sa lubot); 9200 tonelada ang gibug-aton ug 380 ang crew niini.
Kahinumduman nga niadtong buwan sa Septiyembre, 2010, laing US Navy nga USS Chung Hoon (DDG 93) ang mipundo usab diha sa kadagatan sa Talisay. (/EIM) (BANATNEWS)