CEBU, Philippines - Nagplano ang bag-ong Officer In charge (OIC) sa Cebu Provincial Police Office nga tukoron usab sa lalawigan sa Sugbo ang Night Watch Patrol nga sama sa gihimo kapolisan sa syudad sa Sugbo.
Si Sr. Supt. Patrocinio Commendador, OIC sa CPPO mibutyag nga unahon kini pagpatuman sa syudad sa Talisay ug Naga ug mga lungsod sa Minglanilla, Consolacion ug Lilo-an.
Midugang si Comendador nga mopahigayon usab sila og mga checkpoint sa mga lugar diin naghitak ang nagkadaiyang klase sa krimen.
Mihulagway si Comendador nga posibleng usa ka adlaw o gabii sa matag bulan ipahigayon nila ang giingong Night Watch Patrol kini aron usab matabangan ang kapolisan sa kada estasyonan sa pagmintenar sa kalinaw ug kahapsay sa lalawigan.
Gibutyag usab ni Comendador nga ang Special Reaction Unit (SRU) posible usab nga iyang ipakatap sa mga syudad sa lalawigan nga magbilin lang og usa ka team sa headquarters.
Kahinumdoman nga ang Night Watch Patrol gitukod ni Comendador sa siya pay City director sa siyudad sa Sugbo diin ang kapolisan mopahigayon og checkpoint ug pag-roving sa kadalanan gikan sa alas 9:00 sa buntag hangtod na sa alas 3:00 sa kadlawon. - (BANAT NEWS)