Planong pag-operate og nuclear power plant ipadaplin una - Benhur

CEBU, Philippines - Gisugyot ni Kongresista Benhur Salimbangon sa Kongreso nga ipadaplin lang una ang planong pagpadayon pag-operate sa kontrobersyal nga Bataan Nuclear Power Plant sa Bataan ug uban pang planong pagtukod og susamang pasilidad sa nasud nunot sa giatubang karong problema sa nasud sa Japan sa upat niini ka mga nuclear power plants sa Fukushima.

Si Salimbangon nga miyembro sa House Committee on Energy misugyot hinuon nga daghanon ang pagtukod og mga coal power plants aron matubag ang kakulangon sa tinubdan sa kuryente.

Gibutyag ni Salimbangon atol sa interbyu sa DyDD nga iyaha kining gipalanog atol sa tigom sa komitiba kagahapon tungod kay mas barato kini og gastu ug ingon man mas luwas nga gamiton.

Gipasabot ni Salimbangon nga na-usab ang iyang baruganan pagpabor sa pagbanhaw sa Bataan Nuclear power plant ug ingon man sa laraw nila kaniadto ni Gov. Gwendolyn Garcia pagbutang og nuclear power plant dinhi sa Sugbo dihang iyang nakit-an unsa ka dakong problema ang giatubang karong mga panahona sa Japan.

Kagahapon miulbo ug nasunog ang usa sa mga nuclear reactors sa Fukushima Daiichi reactor number 4. Ang pagsunod-sunod og ulbo sa mga nuclear reactors sa Japan nahitabo human moigo ang 8.9 magnitude nga linog nga gisundan og tsunami niadtong Biyernes.

Ang kagamhanan sa Japan bisan paman sa ka-moderno niini sa teknolohiya gikuso-kuso karon sa grabeng kalisdanan tungod sa mga nagsunod-sunod nga trahedya ug karon nabutang sa peligro ang mga molupyo niini ug ubang silingang nasud tungod sa laing trahedyang nag-ung ong nga mao ang nuclear disaster.

Tungod niini, si Salimbangon miusab sa iyang baruganang buhion ang Bataan Nuclear Power Plant sa Batangas. Ang maong planta nga gitukod panahon pa ni kanhi presidente Ferdinand Marcos wala makaandar human mapalagpot ang rehimen ug gimando sa misunod nga administrasyon nga di paandaron tungod sa mga mitumaw nga isyu kabahin sa kaluwasan niini.

Daghang mga eksperto ang miingong dili hustong lugar ang Bataan aron maoy butangan sa usa ka pasilidad nukleyar tungod kay giingong naa sa ilawom niini ang fault line nga tinubdan sa mga linog.

Buot hinuon ni Salimbangon nga tun-an pa og maayo sa gobiyerno ang planong pagpaandar sa maong planta sanglit mao kini ang labing epektibong solusyon pagtubag sa kakuwang sa supply sa kuryente apan nakita usab nila ang kapeligro niini sa panglawas sa tawo.(Darrel Carumba/EIM) (BANAT)