Notadong carnapper tiklo

CEBU, Philippines - Usa ka lalaking gipasanginlang ‘notorious’ carnapper ang nasikop sa Theft and Robbery Section (TRS) sa Cebu City Police Office (CCPO) kagahapon sa buntag tungod sa Close Circuit Television (CCTV) nga gitaud sulod sa establisamentong iyang gikawatan og sakyanan.

Si Chief Insp. Bonifacio Garciano, hepe sa TRS nagkanayon nga ang CCTV footage maoy nahimong yawe nga ilang nadakpan si Rene Englis, 42.

Si Garciano miingon nga si Englis naila nga ‘master of carnappers’ dinhi sa dakbayan ug Metro Cebu nadakpan sa hot pursuit operation sa kapulisan human na-record sa CCTV ang pagpangawat niya sa usa ka motorsiklo nga gipanag-iya sa usa ka negosyante.

Matud ni Garciano ang motorsiklo gipanag-iya ni Fairy Chiu Yu, nga tag-iya sa establisamento diha sa Ramos St., sa barangay Sta Cruz nga gikawatan apan gidemalas ang suspek tungod kay adunay CCTV nga nakakuha sa tanan niyang gibuhat.

Gikataho nga gipisa-pisa na ang motorsiklo dihang narekober sa kapulisan sa usa ka junkshop nga gipanag-iya ni Dingdong Abiso nga nahimutang diha sa barangay Quiot-Pardo ning dakbayan.

Diha sa video footage nakit-an si Englis nga miduol sa maong establisamento ug mipuwesto duol sa nagparking nga motorsiklo ug nagpakaaron-ingnong nag-text sa cellphone, apan sulod lang sa lima ka minutos iya napaandar ang motorsiklo ug daling misibat.

Si Englis miangkong iyang gibaligya ang motorsiklo ngadto sa usa ka Ramil Lascuna sa kantidad nga P5 mil diha sa barangay Quiot kinsa mamalit ug mamaligya usab og second hand nga piyesa sa motorsiklo.

Si Englis sa dihang nahinabi sa mga tigbalita miangkong kaduha na ka higayon nga siya nadakpan sa kapulisan sa susama gihapong pagpangawat og motorsiklo diin una niini diha sa dakbayan sa Mandaue apan ang maong kaso batok kaniya gibasura sa piskaliya.  - BANAT NEWS