"Zero case" ang ilegal nga panagat

CEBU, Philippines - Gibutyag kagahapon ni retired Col. Cesar Enriquez, hepe sa Cebu City Bantay Dagat Commission nga “zero case” o walay kaso bahin sa illegal nga panagat dinhi sa dakbayan sa Sugbo gikan sa Enero hangtod ning buwan sa Marso.

Matud pa ni Enriquez nga nalipay siya ning maong kaugmaran tungod kay nakakat-on na ang mga mananagat sa pagtuman sa balaod ug naglikay nga masilotan.

Matud pa niya nga sa miaging tuig tulo ka mga mananagat ang mikagulkol sa prisohan human hidakpi sa iyang mga sakop nga migamit sa ilegal nga matang sa panagat.

Matud pa ni Enriquez nga nakadawat siya og daghang hulga sa iyang kinabuhi apan iyang giklaro nga igo lang siya mitrabaho sa iyang responsibilidad.

Midugang si Enriquez nga ang mga nasakmit nilang mga isda, gideretso nila paghatag ngadto sa mga charitable institution. Sa pagkakaron giawhag ni Enriquez ang mga mananagat nga magtinarong sa ilang pagpanginabuhi sa kadagatan aron dili sila mapriso.

Ang mga sakop sa Bantay Dagat naglakip sa mga polis sa dakbayan , Maritime Police ug Coast Guard.

Kutob sa madakpan pamultahon og P5,000 ug pagkapriso agad sa gibug-aton sa kaso.  - BANAT NEWS