Mangubat giisip nga bayani

CEBU, Philippines -  Gihulagway ni PRO-7 Chief Supt. Ager Ontog nga usa ka “hero” si PO1 William Mangubat, usa ka Field Training Police (FTP) nga napusilan patay sa tulisan didto sa sitio Mananga II sa barangay Tabunok, siyudad sa Talisay niadtong Biyernes sa hapon.

Gumikan sa bayanihong buhat ni Mangubat misaad si Ontog nga pasidunggan nila kini ug ihatag dayon ang tanang benefit alang sa iyang pamilya.

Hinuon matud pa ni Ontog nga sa dili madugay madakpan ra nila ang duha ka kriminal kinsa nailhan na.

Si Mangubat nakaangkon og usa ka samad pinusilan sa iyang ulo nga maoy hinungdan sa iyang kamatayon diha-diha dayon. Nasayran nga sa alas 4:00 niadtong Biyernes sa hapon si Mangubat gidestino sa ilawom sa taytayan sa Mananga uban sa usa ka laing polis.

Nakita niini ang usa ka tawo nga nagdala og bag sa babaye samtang nagkupot usab sa iyang armas de fuego gikan sa usa ka babayeng gitulis niini sulod sa usa ka PUJ.

Gigukod ni Mangubat ang tulisan apan wala siya kalahutay dihang gipusil patay siya sa tulisan.   - (BANAT NEWS)