CEBU, Philippines - Patay diha-diha ang usa ka negosyante human kini pusila sa wala mailhing kriminal kagahapon sa buntag diha atubangan sa San Isidro Parish sa barangay Mantalungon, lungsod sa Dalaguete.
Ang biktima mao si Godofredo Gerat, 60, taga sitio Mag-alambak sa nahisgutang barangay ang nakaangkon og samad pinusilan sa likod nga bahin sa ulo ug sa lawas nga maoy hinungdan sa iyang kamatayon.
Si SPO1 Veronico Centino, sa Dalaguete Police Station nga nahinabi sa Banat News kagahapon mibutyag nga base sa imbestigasyon nila ni SPO2 Cleto Pia ug PO2 Noeh Rosales si Gerat nagsakay sa iyang motorsiklo gikan sa ilang balay paingon untang mosimba.
Duha ka wala mailhing lalaki nga nagsakay og motorsiklong kolor pula nga ang drayber nagtaptap og panyo sa nawong ug ang angkas nagsul-ob og ski mask ang misunod kang Gerat.
Matud ni Centino nga pag-abot diha sa plaza sa lugar atubangan sa simbahan ang angkas sa motorsiklo kalit mipusil sa biktima dayon daling misibat palayo luwan sa maong motorsiklo.
Base sa nakuhang impormasyon sa kapolisan mao na kini ang ikaduhang higayon nga gibanhigan si Gerat. Niadtong milabay’ng buwan gibanhigan si Great kauban ang iyang kapuyo sa merkado publiko sa maong lungsod ang duha pulos nangaangol.
Nagduda ang kapolisan nga adunay mga tawong nagdumot sa biktima ug karon ilaha nang gisubay. Si Gerat mangomprahay og mga utanon sa bukid nga iyaha usab itumod sa mga biyahedor.
Gawas niini ang biktima duna usab kini umahan ug nanuhol kini sa pagpatikad sa iyang uma. (BANAT NEWS)