CEBU, Philippines - Samdan sa liog ug ibabaw sa tuong dunggan ang usa ka babaye human dunggaba sa kaaway niyang babaye tungod sa giingong panag-ilog sa usa ka lalaki didto sa sitio Camansilis sa barangay Mambaling siyudad sa Sugbu sa miaging gabii .
Ang biktima giilang si Cathy Dandan, 27, walay trabaho, ug nagpuyo sa highway, sa barangay Mambaling samtang ang gikatahapan giila lang sa angga nga Bambam nga taga sitio Palma sa barangay San Roque ning siyudad.
Sa pasiunang imbestigasyon ni SPO3 Rey Cuyos ug mga kaubanan sa Homicide Section nagbutyag nga sa sayo nianang gabii nag-away ang biktima ug ang suspek tungod sa gikatahong panag-ilog nila sa usa ka lalaki.
Giadto sa biktima ang gipuy-an sa usa ka Marvin Castro nga gikatahong iya nang uyab ug kanhi usab kapuyo sa suspetsado apan nasurprisa ang biktima sa dihang kalit lang miabot ang suspek sa balay ni Castro.
Wala nay daghang sulti, gidunggab dayon siya sa suspek hinungdan nga naigo siya sa tuong liog ug ibabaw sa dunggan.
Ang biktima daling gihatod ngadto sa Cebu City Medical Center (CCMC) samtang padayon pang gipangita sa kapolisan ang suspetsado kinsa misibat human sa hitabo. - (BANAT NEWS)