4 patay sa Talisay tungod sa dengue

CEBU, Philippines - Ang dakbayan sa Talisay maoy ika-upat nga daghan og kaso sa dengue niining tuiga kini base sa regional record sa Department of Health matud usab ni Konsehal Choy Aznar sa Talisay kinsa maoy nangulo sa dengue task force.

Niining ulahi lang, si Junalyn Ermita,18, taga sitio Ibakan, barangay Cansojong namatay niadtong milabay’ng adlaw nga matud pang Aznar dengue ang gikamatyan.

Matud ni Aznar nga si Ermita semana na kining nag-antos sa hilanat ug sakit sa ulo apan wala dalha sa iyang mga ginikanan ngadto sa doktor ug gipatambalan lang og ‘binisaya.’

Ang hilanat ni Ermita giingong nagbalik-balik ug ang mga silingan na niini maoy nag-amotay aron madala kini ngadto sa tambalanan apan grabe na kini hinungdan nga nakabsan sa kinabuhi sa Vicente Sotto Memorial Medical Center.

Matud ni Aznar nga nabantayan sa task force kagahapon ang limpiyong tubig sa uwan nga nagpundo diha sa palwa sa tanom nga gabi-gabi nga maoy ilang gituohan nga gipuy-an sa lamok nga dunay dengue.

Niadtong buwan sa Enero duha ka mga bata diha sa barangay San Isidro ang namatay sa dengue ug sa milabay’ng semana usa ka 8-anyos nga batang babaye ang namatay usab sa dengue diha sa sitio Laray, barangay San Roque ug niining ulahi ug ika-upat si Ermita.

Ang usa ka tuig nga manghud nga babaye ni Ermita gihilantan usab matud ni Aznar ug anha pa gidala sa tambalanan dihang giawhag sa maong konsehal.

Ang dengue task force nagsuroy-suroy na usab diha sa kabarangayan gawas sa mga leaflets nga ilang gipanghatag giawhag usab nila ang mga residente sa pagpanglimpiyo aron walay mga lamok nga magpuyo sa palibot.  - BANAT NEWS