CEBU, Philippines - Gipaninguha ni Evangeline Abatayo sa City Civil Registrar's Office nga mo-computerize sa dili matapos karon tuiga ang ilang mga files sa iyang buhatan aron mas paspas kung adunay mokuha kanila og birth certificate, marriage certificate ug uban pa nga mga dokumento diha sa ilang buhatan.
Nagkanayon si Abatayo nga gi-aprobahan na sa konseho ang P20 milyones nga budget alang sa bag-ong tukorong building ug dugang P15 milyones alang sa computerization sa ilang mga files.
Sumala pa niya nga kung matuman na kini, dili na magpaabot nga taas nga oras ang mga tawo nga modangop sa ilang buhatan.
Subling gipahibalo ni Abatayo sa publiko nga kinahanglan nga iparehistro dayon ang mga bata nga bag-o pa lang nga gipanganak aron dili makabayad og P250 nga penalty nga gitawag usab og late registration.
Suma pa niya nga 30 ka adlaw human matawo ang bata, kinahanglan nga marehistro na kini ug walay bayad alang niini. (BANAT NEWS)