Puy-anan sa gidemolish buksan karong adlawa

CEBU, Philippines - Gitakdang ablihan na karong adlawa ang temporaryong pinuy-anan sa mga pamilya nga naapektohan sa nagpadayon nga demolisyon nga gilusad sa kagamhanan ning dakbayan

Sumala pa ni Konsehal Roberto “Bob” Cabbarubias nga kapin sa usa ka libo ka tawo ang masulod sa 50 ka container vans.

Dugang pa sa konsehal nga libre tubig ug kuryente alang sa mga mamuyo sa maong pinuy-anan.

Tugotan silang makapuyo sulod sa usa ka buwan ug igo na kini aron makapangita sila og kabalhinang balay.

“Kasagaran sa maong mga molupyo may mga paryente dinhi sa siyudad, apan aron dili sila makahasol sa ubang tawo, hatagan gyud sila og higayon nga makapangita og kabalhinan” nagkanayon ang konsehal.

Ang temporaryong pinuy-anan nahimutang sa Block 27 sa Barangay Mabolo diin pabutangan gyud kini sa kagamhanan og mga polis aron maseguro ang seguridad sa mga nagpuyo.

Nagkanayon ang konsehal nga mag-agi og bug-at nga screening ang mga tawo nga mopuyo nini aron masuta kung tinuod ba gyud nga naapektohan sila sa demolisyon

Pipila sa mga apektadong pamilya misaad nga motuman sa Balik Probinsya Program.

Sa nahisgutang programa, mohatag og libreng transportasyon ang siyudad aron maoy kargahan sa mga butang sa mga tawo nga mouli sa tagsa-tagsa nila ka probinsya. (BANAT NEWS)