Gwen motabang sa mga apektado sa linog

CEBU, Philippines - Ang buhatan ni Gobernador Gwendolyn Garcia misaad nga motabang sa mga pamilya kansang mga anak nakauban sa mga nabiktima sa linog sa New Zealand.

Sumala pa ni Welson Ramos usa sa mga kawani sa Provincial Social Welfare and Development Office nga kun may mga pamilya sa mga nabiktima sa maong katalagman nga gustong moadto sa New Zealand aron sa pagsud-ong personal sa gidangatan sa ilang mga anak, andam ang gobernador nga motabang niini.

Gani matud pa ni Ramos nga nakigdugtong pag-ayo karon ang ilang buhatan sa Department of Foreign Affairs (DFA) aron masayran ang tinuoray nga kahimtang sa mga Pinoy didto sa New Zealand.

Matud pa ni Ramos nga nagpaabot na lamang sila sa report gikan sa DFA sanglit sila man maoy may otoridad sa pagtumbok sa kahimtang sa mga Pinoy didto sa maong nasud. Dugang pa ni Ramos nga sa higayon nga madawat sa Kapitolyo ang maong report gikan sa DFA magpaabot sila sa mando sa gobernador aron katabangan ang mga pamilya sa OFW nga makaadto sa New Zealand. (WC)  (BANAT NEWS)