Kabanay sa Pinoy nurses sa New Zealand nagpamisa

CEBU, Philippines - Nagpamisa ang mga kabanay ug kahigalaan sa mga Cebuano nurses nga giingong nangapiit sa usa ka edipisyo sa CTV Building sa Christchurch New Zealand nga padayon pang gipangita sa mga rescuers.

Ang maong Santos nga Misa gimugna sa Golden Summit Immigration Consultancy nga maoy mihikay sa pagbiyahe sa maong mga nurses sa New Zealand.

“We pray from our hearts for the safety of our love ones,” matud pa sa nagselebrar nga pari nga si Fr. Ernesto Xavier sa iyang homiliya.

Ang mga kabanay ug kahigalaan sa mga nurses pabiling naglaom nga dako silang buhi ug luwas sa peligro bisan paman og wala na silay komunikasyon kanila.

Lakip sa mga mitambong mao ang mga kabanay sa mga Filipino nurses nga tua na sa New Zealand apan wala maapektahi sa maong linog nga may gikusgong 6.3 magnitude, miduyog sa mga mitambong sa misa kansang mga kabanay na-missing.

Miabot na sa kapin 100 ang naugkat nga mga patay’ng lawas sa maong edipisyo apan wala pay giila ang mga awtoridad si kinsa sila, gikatahong posibleng mogamit sila og deoxyribonucleic acid (DNA) testing una pa nila kini maila.

Ang gituohang natanggong sa maong building nga mga Filipino mao sila si Jesse Lloyd Redoble ; John Christopher Chua ; Ezra Mae Medalle ; Emmabel Anoba ; Jewel Francisco ; Ivy Jane Cabunillas ; Elisa Torres ; Mary Louise Anne Amantillo ; Valquin Bensurto ; Rhea Mae Sumalpong ; Erica Nora ug Lalaine Agatep ug ang staff sa King Education Limited nga si Christiana Carazo.(Gary Lao sa The Freeman/EIM)  (BANAT NEWS)