Mga hepe sa PNP-CV patubagon kay blotter wala magkadimao

CEBU, Philippines - Patubagon ang tanang City ug Provincial directors sa kapulisan tibuok Central Visayas human masuta nga dunay kuwestiyonable ang natala sa ilang mga police blotters tungod kay daghang mga nanghitabo sa ilang mga hurisdiksyon nga wala nila ma-rekord.

Kini maoy gibutyag human sa gihimong pakisusi sa pangulo sa Regional Investigation and Detective Management Division (RIDMD) nga si Sr. Supt. Patrocinio Comendador .

Matud pang Comendador ang Campo Crame maoy mipahibalo sa Police Regional Office-7 nga e-validate og balik ang tanang police blotters sa Central Visayas kabahin sa pangangkong mikunhod og 17 porsiyento ang crime statistics sa rehiyon siyete.

Matud ni Comendador daghang kuwestiyonableng natala sa blotter human siya personal nga mibisita sa mga police stations sa dakbayan sa Mandaue ug Lapulapu nga dunay tag 20 ka panghitabo nga wala matala.

Sa dakbayan sa Sugbu ang police station 2 maoy pinakadaghang panghitabo nga wala matala sanglit 40 lang ka insidente ang nabutang sa blotter gikan sa 126 ka aktwal nga panghitabo sa ilang area of responsibility.

Matud ni Comendador nga sa dakbayan sa Mandaue, Lapulapu ug Fuente Police Station, 70 ngadto sa 80 porsiyentong sayop ug tungod niini apil sa posibleng sayop og nakuhang data ang National Crime Reporting System.

Tungod niini dako ang posibilidad nga misaka ang crime volume sukwahi sa gipasiatab sa mga hepe sa maong siyudad nga mikunhod ang crime volume.

Matud ni Comendador nga base sa guidelines sa Crame niadtong 2009 ang tanang hepe sa mga police stations patubagon gawas nga mag-atubang sila og kasong serious irregularity.

Nagkanayon siya nga karung ikaduhang semana sa bulan sa Marso kuhaon nila ang tanang blotters sa kapulisan aron ilang itandi sa nakuha nilang impormasyon ug ila usab ipatawag ang in-charge sa National Crime Reporting System.

Matud ni Comendador sa kamanduan sa Crame nga kun mosaka o ba kaha mokunhod ang crime volume patubagon gihapon ang hepe niini.

Si Supt. Jonathan Abella, ang deputy chief for operations sa Mandaue City Police Office miangkong aduna gyuy posibilidad nga may mga nanghitabo sa areas of responsibility sa mga police stations nga di matala ug adto lang sa barangay.

Samtang malangay usab ang pagpasa sa mga report gikan sa mga presinto ngadto na sa ilang buhatan. (Rey Pasaporte ug Romeo Limpangog/EIM) (BANAT NEWS)