Missing nga babaye mikuyog diay sa uyab

CEBU, Philippines - Nakit-an na sa kapulisan ang usa ka 27- anyos nga babaye nga una nang gi-alarmang gikatahong gi-pick up sa mga sakop sa Criminal Investigation and Detection Group -7 tungod sa giingong pagdudang may kalambigitan kini sa pagdagit ug pagpatay sa 6-anyos nga si Ellah Joy Pique.

Alas 7:00 sa buntag kagahapon nakit-an sa kapulisan si Felisa Sasan, dalaga apan dunay kapuyong atoa sa bilanggoan nga nagtrabaho sa usa ka KTV bar sa Talisay tungod sa pagkapriso sa iyang kapuyo.

Si Sasan anha na mapalgi sa kapolisan sa sitio Grayrock barangay Pangdan sa lungsod sa Naga dihang naagian sa mga polis nga nangita kaniya.

Dihang gidapit si Sasan sa kapulisan sa ilang buhatan ug gisukit sukit mitug-an kini nga mikuyog siya sa iyang hinigugma sulod sa duha ka adlaw, kini mao ang mga adlaw nga giingong na-missing ang dalaga.

Gihimakak usab niyang gi-pickup siya sa mga polis. Ang CIDG-7 hugtanong mihimakak nga aduna silay gikostudiyang babaye dihang giadto sa mga ginikanan ni Sasan niadtong milabay’ng adlaw’ng Huwebes.

Matud pa ni PO3 Francisco Codiñera dihang nahinabi sa Banat News mga alas 11:00 sa buntag gi-pickup sa iyang ginikanan nga sila si Feliciano ug Nerissa Sasan diha sa police station ang dalaga.

Ang mga ginikanan niini una nang midangop kang Mayor Valdemar Chiong sayo kagahapon sa buntag aron unta magpatabang nga makit-an og balik ang ilang anak. - (BANAT NEWS)