CEBU, Philippines - Nabulit sa samad pinusilan ug namatay ang usa ka estambay human pusila makadaghang higayon sa gituohang kaatraso niini sa ihawan sa barangay Canbanua lungsod sa Argao kagahapon sa alas 5:40 sayo sa buntag.
Ang biktima nga nakaangkon og pito ka samad pinusilan sa lain-laing bahin sa lawas mao si Ernesto Reyes Abrigana, 38, giingong gipusil sa usa ka ginganlan og Nanting Panes nga taga barangay Poblacion sa maong lungsod.
Matud ni PO2 Benjamen Gerozaga, desk officer sa Argao Police Station dihang nahinabi sa Banat News ang mga tanod nga nadestino sa maong ihawan mibutyag nga naghangos nga miabot ang biktima sa maong lugar ug nagpatabang tungod kay dunay tawo nga buot mopatay niya.
Ang mga tanod ug trabahante sa maong ihawan daling mipatago sa biktima sa guard house apan samtang nagtrabaho ang mga empleyado sa maong ihawan kalit lang mipaka ang sunod-sunod nga buto sa armas.
Gikatahong nakit-an nila ang suspek nga nagdaling misibat pahilayo gikan sa maong lugar ug dihang ilang gisusi nagkulob na ang biktima ug wala nay kinabuhi. Ang mga polis nakapunit og duha ka deformed slug sa kalibre .45 ug laing unom ka kabhang sa bala sa kalibre .45 nga gituohang gikan sa armas nga gigamit sa suspek.
Sa paghimo ning balita padayun pa ang hot pursuit operation sa kapulisan sa nakasibat nga suspek ug matud ni PO2 Gerozaga personal nga pagdumot ang motibo sa krimen. - /EIM (BANAT NEWS)