CEBU, Philippines - Gihingusgan sa buhatan sa Housing on Urban Development Office (HUDO) ang pagsuhid sa mga molupyo sa 27 ka barangay sa dakbayan sa Mandaue aron pag-ila sa mga professional squatter nga nanukod og balay sa mga yuta sa gobyerno aron makadawat og hinabang gikan sa kagamhanan sa panahong papahawaon sila.
Si Emmanuel Arong nga maoy nangulo sa HUDO miingon nga ilang gitagsatagsa sa pagsuhid sa mga background sa maong mga molupyo.
Ilang gipaminaw kun dili ba sila mga namalhin gikan sa luna sa kagamhanan nga gipuy-an nila kaniadto unya ilang gibaligya ug nanukod na usab og bag-ong balay sa mga dapit gihapon sa gobyerno.
Si Arong miingon ubos sa Republic Act 7279 kon Urban Development and Housing Act nasayran nga ang mga professional squatter mao kadtong grupo sa mga tawo nga mopuyo sa luna nga walay pananghid sa tag-iya sa pribado o kaha iya sa gobyernong yuta.
Dugang pa niya nga matawag gihapong professional squatter kadtong tawo o grupo sa mga tawo nga gihatagan na sa housing unit sa gobyerno apan gibaligya o gipaabangan, ug mibalik na usab sa pagtukod og balay sa mga bakanteng luna nga gipanag-iya sa gobyerno o pribado tawo.
Sa iyang bahin si Mayor Jonas Cortes miingon nga samtang ilang giandam ang kabalhinan nga luna alang niadtong qualified nga mga informal settler sa gihapon ang iyang administrasyon higpit usab nga mopatuman sa lagda sa balaod batok niadtong mopahimulos sa kahigayonan. (BANAT NEWS)