CEBU, Philippines - Usa ka Norwegian national kinsa naghithit og marijuana sulod sa pansayan sa usa ka inilang hotel sa dakbayan sa Lapulapu, gisikop sa mga security guard sa maong establisamento sa miaging gabii.
Ang suspetsado nailhan nga si Tony Richard Ben Yuvsep, 48, lumad nga taga Norway ug temporaryong nagpuyo sa barangay Bangbang sa lungsod sa Cordova.
Si SPO3 Nicanor Bacayo sa Pusok Police Substation nga nahinabi sa Banat News miingon nga si Yuvsep misulod sa comfort room sa Waterfront Hotel and Casino sa barangay Mactan, sa maong dakbayan sa mga alas 10:00 pasado sa gabii.
Dihang nakatimaho ang mga guwardiya og baho nga dili kasagaran, ilang gisil-ing ang pansayan ug didto nasakpan nila akto si Yuvsep nga nalingaw sa paghithit sa linikit nga marijuana busa ila kining gibadlong.
Human badlonga, ang mga security guard nga sila si Randy Mabos ug Jayner Punongbayan midala kang Yuvsep ngadto sa Pusok Police Station ug didto gitahan sa maong langyaw ang lain pang linikit nga marijuana nga gisulod sa kaha sa sigarilyo.
Si SPO3 Bacayo midugang nga ang maong langyaw nangatarungan nga wala siya magdahum nga sikopon siya sa mga guwardiya tungod kay didto sa ilang nasud dili man dakpon ang maghithit og marijuana kay legal man ang maong butang didto sa Norway, matud pa niya. Ug Bong Soriano/WC (BANAT NEWS)