Nagtong-its gipusil patay sud sa payag

CEBU, Philippines - Patay diha-diha ang usa ka lalaki human pusila sa wala hiilhing kriminal samtang nagduwa og tong-its sa usa ka payag didto sa barangay Langtad, dakbayan sa Naga sa miaging gabii.  

Ang biktima mao si Jessie Alperez, hingkod, minyo, nga taga barangay Poblacion, sa maong dakbayan.

Si PO2 James Canete sa Naga Police Station mibutyag sa Banat News nga sa sayo pa ang biktima nalingaw kaayo uban sa iyang mga higala nga nagtong-its.

Unya kalit lang miabot ang wala hiilhing kriminal ug sa walay pupangutana gidul-itan sa iyang armas de fuego ang likod sa biktima nga nagyaka sa may pultahan sa payag.

Human mopaka ang mga boto sa armas nakalitan ang tanang kauban sa biktima ug gumikan sa kangitngit sa palibot misibat ang kriminal nga walay nakaila.

Ang tulo ka samad sa buko-buko maoy namatyan sa biktima pipila ka gutlo human kini ikahatod ngadto sa tambalanan.

Padayon pang gipangita sa kapolisan sa kriminal. (BANAT NEWS)